⛓️ سلسلة الكلمات (اتحدّى نفسك) — فكّ السلسلة كلمة كلمة

نسخة «اتحدّى نفسك» من سلسلة الكلمات. مفيش صاحب يكتب لك سلسلة ولا حد تستنّاه — البنك بيدّيك سلسلة من 10 كلمات، كل كلمتين ورا بعض بيعملوا مصطلح معروف (عصب → حياة → كريمة → أخلاق…). الكلمة الأولى قدامك كاملة، والباقي باين منهم أول حرف بس، وانت بتفكّها بالترتيب: تخمّن، أو تطلب حرف، أو تعدّي الكلمة. كل كلمة ليها نقطها، والحرف اللي بتطلبه بينقّص منها. وفي الآخر لقبك وكل السلاسل بوصلاتها، ورقمك القياسي محفوظ على جهازك.

كام لاعب؟ 👥

انت وبس — لوحدك على موبايلك، من التطبيق أو من المتصفح. مفيش روم ولا كود، بتبدأ في ثانية.

إزاي تقدر تلعب اللعبة؟ 🎮

• اختار عدد السلاسل واللغة والوقت، ودوس «يلا نبدأ».
• السلسلة قدامك: الكلمة الأولى كاملة، والتسعة الباقيين خانات باين منها أول حرف.
• خمّن الكلمة التانية من الوصلة مع الأولى — اكتبها ودوس «خمّن».
• جبتها؟ بتتفتح وتتنقل للي بعدها على طول. غلطت؟ ببلاش، جرّب تاني.
• مش جاية؟ اطلب حرف (بيفتح لك الحرف اللي بعد المفتوحين)، أو عدّي الكلمة وتتكشف بصفر.
• فوق الشاشة نقطك وكام كلمة فكيت، وفي الآخر السلسلة كلها بالوصلات اللي بين كل كلمتين.
• «العب تاني» بيبدأ سلسلة جديدة على طول — والسلسلة اللي عدّت مبترجعش على جهازك.

بتحدد إيه قبل ما تبدأ؟ ⚙️

• عدد السلاسل في اللعبة — من 1 لـ5.
• اللغة: عربي ولا إنجليزي ولا الاتنين مع بعض.
• وقت التفكير في الكلمة الواحدة: مفتوح، أو من 30 لـ90 ثانية.
• إعداداتك بتتحفظ على جهازك — المرة الجاية بتلاقيها زي ما سبتها.

قواعد اللعبة 📋

• السلسلة 10 كلمات ثابتة، وبتتفك بالترتيب: مينفعش تقفز كلمة.
• التخمينة الغلط ببلاش — بس لازم تجرّب تخمّن مرة قبل ما تطلب حرف.
• آخر حرف مش بيتطلب — لو فاضل حرف واحد لازم تخمّنها.
• «الـ» مش لازم تكتبها: «شمس» و«الشمس» نفس التخمينة. والمطابقة كلمة بكلمة من غير تسامح — حرف غلط = كلمة تانية.
• خلص الوقت ومجبتش الكلمة؟ بتتكشف بصفر وتكمّل على اللي بعدها.
• ولو قفلت التطبيق أو النت قطع، الوقت بيقف معاك — ترجع تكمّل من نفس الكلمة.
• الكلمات المقفولة مبتوصلش لموبايلك غير لما تتفتح — فالرقم القياسي بتاعك حقيقي.

نظام النقط والمكسب 🏆

• كل كلمة تفكّها 10 نقط، والكلمة الأخيرة 70 — يعني السلسلة الكاملة 150.
• كل حرف بتطلبه بينقّص 3 من نقط الكلمة (و20 من الأخيرة)، والكلمة اللي بتعدّيها بصفر.
• مفيش حد تتغلب عليه — اللي بتتغلب عليه رقمك القياسي لكل عدد سلاسل لوحده. وفي الآخر بيطلع لقبك — من «حظ أحسن المرة الجاية» لـ«ملك السلاسل» — والإحصائيات: كام كلمة فكيت، وكام حرف طلبت.

أسئلة شائعة ❓

ألعب اللعبة إزاي؟ تقدر تنزّلها من على جوجل بلاي وتلعبها من خلال التطبيق بشكل سهل وسريع لمستخدمي الأندرويد.

أعمل إيه لو مش قادر أنزّل التطبيق من جوجل بلاي أو لو كنت من مستخدمي الآيفون؟ تقدر تلعبها على المتصفح على طول من اللينك ده hazzar.app بسهولة جدًا برضه.

محتاج أسجّل حساب؟ لأ — عشان نضمنلك أسهل تجربة لعب.

الرقم القياسي بيتحفظ فين؟ على جهازك انت بس — لو غيّرت الموبايل أو مسحت بيانات المتصفح بيبدأ من الأول.

محتاج نت؟ أيوه — السلاسل بتيجي من السيرفر، وده اللي بيخلّي البنك يكبر من غير ما تحدّث حاجة.

لو النت قطع؟ الوقت بيقف، وأول ما ترجع بنفس الجهاز بتكمّل من نفس الكلمة ونقطك محسوبة.