💡 خليك لمَّاح (اتحدّى نفسك) — تلميحة ورا تلميحة لحد ما تجيبها

نسخة «اتحدّى نفسك» من خليك لمَّاح. مفيش حد بيكتب التلميحات ولا حد تستنّاه — اللعبة نفسها هي اللي بتلمّح: كل كلمة معاها 10 تلميحات جاهزة بتنزل واحدة ورا التانية، وكل واحدة أقرب للكلمة من اللي قبلها. اكتب تخمينك، ولو غلط تنزل التلميحة اللي بعدها على طول — وكل ما تجيبها بدري تاخد نقط أكتر. وفي الآخر لقبك وإحصائياتك، ورقمك القياسي محفوظ على جهازك عشان تحاول تكسره.

كام لاعب؟ 👥

انت وبس — لوحدك على موبايلك، من التطبيق أو من المتصفح. مفيش روم ولا كود، بتبدأ في ثانية.

إزاي تقدر تلعب اللعبة؟ 🎮

• اختار عدد الكلمات والكاتيجوريز والمستوى والوقت، ودوس «يلا نبدأ».
• بتيجي كلمة سرية وتحتها أول تلميحة.
• اكتب تخمينك ودوس «خمّن»، أو دوس «مش عارف» لو مش جاية في دماغك.
• غلطت أو عدّيت؟ تنزل على طول تلميحة جديدة أقرب للكلمة — وتجرّب تاني.
• حاسس إن الكلمة مش جاية خالص؟ دوس «مش هعرفها خالص — عدّي الكلمة»؛ الجولة بتقفل بصفر والكلمة بتتكشف.
• جبتها؟ الكلمة بتتكشف مع نقطك، والكلمة اللي بعدها بتنزل.
• فوق الشاشة نقطك وكام كلمة جبتها، وتحتها السلّم كله: كل تلميحة عدّت وتخمينك عليها.
• وفي الآخر لقبك والإحصائيات، وكل الكلمات اللي عدّت وجبتها من أنهي تلميحة.

بتحدد إيه قبل ما تبدأ؟ ⚙️

• عدد الكلمات في اللعبة — من 1 لـ15.
• الكاتيجوريز اللي هتيجي منها الكلمات: أكل ومشروبات، حيوانات، أماكن، حاجات، إسلاميات، تاريخ، رياضة، نجوم كورة، ومشاهير وفن.
• مستوى الكلمات: سهل ولا متوسط ولا صعب — وينفع تختار أكتر من مستوى مع بعض.
• وقت التخمين على التلميحة الواحدة: من 20 لـ60 ثانية، أو وقت مفتوح.
• إعداداتك بتتحفظ على جهازك — المرة الجاية بتلاقيها زي ما سبتها.

قواعد اللعبة 📋

• كل كلمة معاها 10 تلميحات، وعندك تخمينة واحدة على كل تلميحة.
• غلطت؟ التلميحة اللي بعدها بتنزل على طول — ونقط الكلمة بتقل درجة.
• المطابقة متسامحة مع غلطة إملا صغيرة: «صلاح» و«محمد صلاح» و«مو صلاح» كلها بتتقبل — بس الكلمات القصيرة لازم تتكتب صح.
• ولو كتبتها بشكل تاني ومقبلتهاش، بعد ما تتكشف تدوس «كانت عندي تخمينة صح» وتختار أنهي واحدة وتقارنها بالكلمة — ولو نفس الكلمة تتحسبلك.
• خلص الوقت وانت مخمّنتش؟ التلميحة بتعدّي زي «مش عارف».
• الكلمة اللي عدّت مبترجعش تاني، لا في نفس اللعبة ولا في «العب تاني».
• ولو قفلت التطبيق أو النت قطع، الوقت بيقف معاك — ترجع تكمّل من نفس التلميحة.
• التلميحة الجاية مبتوصلش لموبايلك غير في وقتها — فالرقم القياسي بتاعك حقيقي.

نظام النقط والمكسب 🏆

• جبتها من أول تلميحة؟ 100 نقطة. من التانية 90، من التالتة 80… لحد 10 في الأخيرة. ومجبتهاش خالص؟ صفر للكلمة دي.
• مفيش حد تتغلب عليه — اللي بتتغلب عليه رقمك القياسي: أحسن نتيجة ليك بتتحفظ على جهازك لكل عدد كلمات لوحده.
• وفي الآخر بيطلع لقبك — من «حظ أحسن المرة الجاية» لـ«لمّاح خطير» — والإحصائيات: أسرع لمحة، ومتوسط التلميحات، وأطول سلسلة.

أسئلة شائعة ❓

ألعب اللعبة إزاي؟ تقدر تنزّلها من على جوجل بلاي وتلعبها من خلال التطبيق بشكل سهل وسريع لمستخدمي الأندرويد.

أعمل إيه لو مش قادر أنزّل التطبيق من جوجل بلاي أو لو كنت من مستخدمي الآيفون؟ تقدر تلعبها على المتصفح على طول من اللينك ده hazzar.app بسهولة جدًا برضه.

محتاج أسجّل حساب؟ لأ — عشان نضمنلك أسهل تجربة لعب.

الرقم القياسي بيتحفظ فين؟ على جهازك انت بس — لو غيّرت الموبايل أو مسحت بيانات المتصفح بيبدأ من الأول.

محتاج نت؟ أيوه — الكلمات والتلميحات بتيجي من السيرفر، وده اللي بيخلّي البنك يكبر من غير ما تحدّث حاجة.

لو النت قطع؟ الوقت بيقف، وأول ما ترجع بنفس الجهاز بتكمّل من نفس التلميحة ونقطك محسوبة.