💡 خليك لمَّاح على جهاز واحد — تلميحة ورا تلميحة على نفس الموبايل لحد ما تجيبوها

نسخة «موبايل واحد» من خليك لمَّاح. مفيش حد بيلمّح — اللعبة نفسها هي اللي بتلمّح: كل كلمة معاها 10 تلميحات جاهزة بتنزل واحدة ورا التانية على الموبايل اللي في النص، وكل واحدة أقرب للكلمة من اللي قبلها. اللي يعرفها بيدوس على اسمه ويكتب إجابته في السر، وكل ما يعرفها من تلميحة أبكر ياخد نقط أكتر — من غير روم ولا كود.

كام لاعب؟ 👥

من 3 لـ 12 لاعب على موبايل واحد في النص.

إزاي تقدر تلعب اللعبة؟ 🎮

• اكتبوا أساميكم واظبطوا الإعدادات ودوسوا «يلا نبدأ».
• كل جولة كلمة جديدة: بتنزل أول تلميحة على الشاشة والكل شايفها.
• حد عارفها؟ يدوس على اسمه ويكتب إجابته في السر — بتتقفل لحد ما الكلمة تتكشف، ومش بيخمّن تاني.
• محدش عارف؟ حد يدوس «التلميحة الجاية» (أو الوقت بيعدّيها لوحده) — والتلميحات اللي عدّت بتفضل ظاهرة فوق.
• الكل مش عارف خالص؟ دوسوا «مش عارفين — عدّوا الكلمة» تحت الأسامي، واللي لسه مسلّمش بياخد صفر فيها.
• في آخر تلميحة اللي لسه مسلّمش يسلّم، أو دوسوا «اكشفوا الكلمة».
• لما الكل يسلّم الكلمة بتتكشف، وكل واحد بيشوف إجابته صح ولا غلط ونقطه.

بتحددوا إيه قبل ما تبدأوا؟ ⚙️

• عدد الجولات — كل جولة كلمة جديدة.
• الكاتيجوريز اللي هتيجي منها الكلمات: أكل ومشروبات، حيوانات، أماكن، حاجات، إسلاميات، تاريخ، رياضة، نجوم كورة، ومشاهير وفن.
• مستوى الكلمات: سهل ولا متوسط ولا صعب — وينفع أكتر من مستوى مع بعض.
• وقت التلميحة الواحدة — ولو مفتوح، حد بيدوس «التلميحة الجاية».

قواعد اللعبة 📋

• كل كلمة معاها 10 تلميحات من الأعم للأخص.
• إجابة واحدة بس للكلمة الواحدة — لو سلّمت غلط خلاص، مفيش تاني. فكّر قبل ما تسلّم.
• إجابتك مقفولة ومحدش بيشوفها لحد ما الكلمة تتكشف.
• المطابقة متسامحة مع الإملا: «صلاح» و«محمد صلاح» و«مو صلاح» كلها بتتقبل.
• ولو كتبتها بشكل تاني ومقبلتهاش، بعد ما الكلمة تتكشف تقدروا تحسبوها له من «حد جاوب صح ومتحسبتش؟».
• الكلمة اللي اتلعبت على الموبايل ده مبترجعش تاني.

نظام النقط والمكسب 🏆

• جبتها من أول تلميحة؟ 100 نقطة. من التانية 90، من التالتة 80… لحد 10 في الأخيرة.
• كل واحد بياخد نقط التلميحة اللي سلّم عندها — أكتر من واحد ممكن يجيبها في نفس الجولة. الغلط أو التعدية صفر.
• وفي الآخر بيطلع الترتيب والجوايز: بطل اللمّة، واللمّاح، وأسرع لمحة.

أسئلة شائعة ❓

ألعب اللعبة إزاي؟ تقدر تنزّلها من على جوجل بلاي وتلعبها من خلال التطبيق بشكل سهل وسريع لمستخدمي الأندرويد.

أعمل إيه لو مش قادر أنزّل التطبيق من جوجل بلاي أو لو كنت من مستخدمي الآيفون؟ تقدر تلعبها على المتصفح على طول من اللينك ده hazzar.app بسهولة جدًا برضه.

محتاج أسجّل حساب؟ لأ — عشان نضمنلك أسهل تجربة لعب.

النقط بتتحفظ؟ اللعبة بتفضل محفوظة على الموبايل لحد ما تخلصوها — لو الصفحة اتقفلت بترجعوا من نفس المكان.

ينفع نلعب كل واحد من موبايله؟ أيوه — دي النسخة اللي على موبايل واحد، ولو كل واحد معاه موبايله فيه نسخة الشلة (حد بيلمّح) ونسخة صاحبك (البنك بيلمّح) من قسم «كل واحد بجهازه».

لو النت قطع؟ النت محتاجينه أول ما تدوسوا «يلا نبدأ» بس عشان كلمات الجيم تيجي — وبعدها اللعبة كلها على الموبايل.