🎭 الجاسوس على جهاز واحد — موبايل واحد في النص، والكل يهبد ويكتشف مين اللي مش عارف الكلمة

نفس لعبة الجاسوس بس على موبايل واحد بيلف عليكم في القعدة — من غير روم ولا كود ولا نت غير أول ما تفتحوها. كل واحد بيدوس على اسمه ويشوف الكلمة السرية في السر ما عدا واحد وهو الجاسوس — بيكون شايف الكاتيجوري بس. وبالدور كل واحد بيقول كلمة واحدة بصوت عالي توصف الكلمة، والجاسوس بيهبد معاكم كأنه عارفها. وفي الآخر كل واحد بيصوّت في السر على مين الجاسوس، وهو بيحاول يخمّن الكلمة.

كام لاعب؟ 👥

من 3 لـ 12 لاعب على موبايل واحد، وكل ما العدد كبر كل ما بقت أمتع — فأحسن تجربة من 6 لـ 10.

إزاي تقدر تلعب اللعبة؟ 🎮

• اكتبوا أساميكم واظبطوا الإعدادات ودوسوا «يلا نبدأ».
• الموبايل بيلف عليكم: كل واحد بيدوس على اسمه، وبيضغط على الكارت ويستمر عشان يشوف الكلمة السرية والكاتيجوري — إلا اللي طلع الجاسوس، بيلاقي مكتوب إنه الجاسوس ومش شايف الكلمة.
• الكارت بيبان وانت ضاغط عليه بس، وأول ما تسيبه بيختفي. وبعد ما تدوس «خلاص شفتها» مش بيتفتح تاني.
• لما الكل يشوف، حطّوا الموبايل في النص: الشاشة بتقول الدور على مين، وكل واحد بيقول كلمة واحدة بصوت عالي توصف الكلمة، والجاسوس بيهبد معاكم.
• في الآخر كل واحد بيمسك الموبايل ويصوّت في السر على مين الجاسوس — والجاسوس كمان بيصوّت عشان ما يبانش.
• بعد ما يتكشف، الجاسوس بيقول تخمينه للكلمة بصوت عالي، والشلة بتقول عرفها ولا لأ.

بتحددوا إيه قبل ما تبدأوا؟ ⚙️

• الكاتيجوريز اللي هتيجي منها الكلمات السرية.
• مستوى الكلمات — سهل ولا متوسط ولا صعب.
• عدد الجولات في الجيم.
• كل لاعب هيقول كام كلمة يوصف بيها الكلمة السرية.
• عدد الجواسيس — يبقى عشوائي ولا تحددوه: جاسوس أو جاسوسين أو تلات جواسيس.
• الجاسوس يشوف الكاتيجوري ولا لأ.
• وقت الكلمة الواحدة — ولو مفتوح، اللي قال كلمته بيدوس «التالي».

قواعد اللعبة 📋

• بتقول كلمة واحدة بس في الدور — ممنوع تقول الكلمة نفسها أو حاجة قريبة منها.
• قول دايمًا كلمة تثبت إنك عارف من غير ما تدّي الجاسوس مفتاح جوهري وتسهّلها عليه.
• ركّز مع اللي بيقول كلام عام أو مش عارف يقول إيه والوقت بيخلص عليه — ده أول خيط.
• ممنوع تكرار كلمة اتقالت قبلك.
• لو حد مش موجود وقت التصويت تقدروا تعدّوه، ومش هيصوّت في الجولة دي.
• لو الجاسوس خمّن الكلمة صح بس بصيغة تانية، الشلة هي اللي بتحكم — دوسوا «عرفها».

نظام النقط والمكسب 🏆

• اللي بيصوّت على الجاسوس صح بياخد 100 نقطة.
• الجاسوس لو قدر يفلت من الكل بياخد 100 نقطة، ولو قدر يفلت من شوية وشوية لأ بياخد 50.
• الجاسوس برضه لو قدر يخمّن الكلمة صح في الآخر بياخد 100 نقطة. وفي الآخر فيه جوايز: بطل اللمّة، والمخبر، والجاسوس المحترف، وقارئ الأفكار، والجاسوس الفاشوش.

أسئلة شائعة ❓

ألعب اللعبة إزاي؟ تقدر تنزّلها من على جوجل بلاي وتلعبها من خلال التطبيق بشكل سهل وسريع لمستخدمي الأندرويد.

أعمل إيه لو مش قادر أنزّل التطبيق من جوجل بلاي أو لو كنت من مستخدمي الآيفون؟ تقدر تلعبها على المتصفح على طول من اللينك ده hazzar.app بسهولة جدًا برضه.

محتاج أسجّل حساب؟ لأ — عشان نضمنلك أسهل تجربة لعب لكل أصحابك في الشلة.

النقط بتتحفظ؟ اللعبة بتفضل محفوظة على الموبايل لحد ما تخلصوها — لو الصفحة اتقفلت بترجعوا من نفس المكان.

ينفع نلعب كل واحد من موبايله؟ أيوه — دي النسخة اللي على موبايل واحد، ولو كل واحد معاه موبايله العبوا النسخة اللي بكود الروم من قسم «كل واحد بجهازه».

لو النت قطع؟ عادي — اللعبة بتشتغل على الموبايل نفسه، النت محتاجينه أول ما تفتحوها بس.