💰 خبّي فلوسك — لعبة تخمين فلوس بين اتنين

لعبة تحدّي بين اتنين بس. كل واحد بيخبّي مبلغ فلوس في موبايله، والتاني لازم يعرفه — مش بالحظ، بالأسئلة: تسأله سؤال يترد عليه بأيوة أو لا، وتضيّق عليه شوية شوية لحد ما توصل للرقم بالظبط. ومعاك 3 محاولات في الجولة ومش أكتر.

كام لاعب؟ 👥

اتنين بس — انت وصاحبك، كل واحد على موبايله. واحد بيعمل روم ويبعت الكود للتاني، أو يصوّر الـQR.

إزاي تقدر تلعب اللعبة؟ 🎮

• حد فيكم بيعمل روم وبيبعت الكود للتاني.
• في أول كل جولة، كل واحد بيخبّي مبلغ لوحده: بتختار الرينج اللي فلوسك جوّاه، وتحته مكتوب هتكتب بإيه (عشرات؟ ألوف؟ ملايين؟)، وبعدين بتكتب الرقم في المربعات اللي بتظهرلك.
• وصاحبك مش شايف لا الرقم ولا الرينج اللي اخترته — كل حاجة سر.
• وبعدين بتتبادلوا الأدوار. في دورك قدامك خانتين مفتوحين مع بعض وانت حر تستخدم أنهي واحدة: خانة السؤال وخانة التخمين.
• السؤال أي حاجة تترد بأيوة أو لا: «أكتر من ألف؟» «ينفع تشتري بيها عربية؟» «تكفي عشا لاتنين؟»
• وصاحبك بيرد بـأيوة أو لا أو مش متأكد — وبس، مفيش رد بالكلام.
• كل الأسئلة والردود والمحاولات بتتكتب في سجل الاتنين شايفينه — منه بتضيّق عليه لحد ما تقول الرقم بالظبط.

الهوست بيحدد إيه؟ ⚙️

• عدد الجولات — كل جولة رقم جديد لكل واحد.
• عدد الأدوار لكل لاعب في الجولة: 10 أو 20 أو 30.
• الرينجات المسموحة — يقدر يقفل أي رينج مش عايزينه.
• هل لو الرد «أيوة» تكمّل تسأل تاني ولا الدور بيتبادل دايمًا مهما كان الرد.
• وقت الدور: 30 أو 45 أو 60 أو 90 ثانية، أو وقت مفتوح.
• ولو حد بيعطّل، الهوست بيقدر يعدّي دوره من غير ما يتخصم منه.

قواعد اللعبة 📋

• الرينجات أربعة: 0 ← 1000 بالعشرات (تلات مربعات)، و1000 ← 100 ألف بالألوف (خمس مربعات)، و100 ألف ← مليون بعشرات الألوف (ست مربعات)، ومليون ← 100 مليون بالملايين (تمن مربعات).
• الحد الأعلى في كل رينج مش داخل فيه: اللي عايز 1000 بالظبط بياخدها من الرينج اللي بعده — كده كل رقم ليه مكان واحد بس.
• والأربعة فيهم عدد احتمالات متقارب، فمفيش رينج «آمن» تختبي فيه — اختار اللي يضحك عليه.
• المربعات اللي في آخر الرقم رمادية وفيها صفر ومقفولة — يعني في رينج الألوف مش هتكتب 2500، هتكتب 2000 أو 12000 أو 52000. ده اللي بيخلّي الرقم قابل إن حد يوصله أصلًا.
• ومش لازم تكتب أصفار: عايز 2000؟ اكتب 2 وخش — الأرقام بتترصّ لوحدها من ناحية اليمين.
• كل سؤال وكل محاولة بتاكل دور من أدوارك. الرد على سؤال مش بياكل دور.
• اسألوا أسئلة كويسة عشان اللعبة تبقى أحلى: خلّي السؤال عن حاجة تتشاف — «تقدر تشتري بيها عربية؟» «تقدر تشتري بيها كيس شيبسي؟». وبلاش أسئلة زي «أكتر من 500 ألف؟» — دي بتحوّل اللعبة لحسبة وبتحرقها في خمس أسئلة.
• لو الوقت خلص وانت ساكت، الدور بيضيع منك.
• ولو سؤال متسألك ومردتش لحد ما الوقت خلص، بيتحسب «مش متأكد» وبيتخصم منك 5 نقط — السكوت مش لعب. (ولو النت كان قاطع مبيتخصمش منك حاجة، اللعبة بتقف وتستنّاك.)
• أول ما حد فيكم يجيب الرقم صح، الجولة بتقف — بس التاني بياخد محاولة واحدة أخيرة قبل ما تقفل، من غير أسئلة. وخلصت أدوار الاتنين من غير ما حد يعرف؟ الجولة بتقفل والرقمين بيتكشفوا.

نظام النقط والمكسب 🏆

• اللي يعرف رقم صاحبه ياخد 100 نقطة، واللي معرفش ياخد صفر. ولو رقمك انت فضل سر لآخر الجولة ومحدش عرفه، بتاخد 50 نقطة كمان — يعني أحسن جولة 150 نقطة.
• وكل سؤال متردش عليه لحد ما الوقت يخلص = −5 نقط.
• في آخر اللعبة بيطلع الترتيب والجوايز: بطل الفلوس، أشطر محقق، صاحب الرقم الصعب، وأكتر واحد سأل.

أسئلة شائعة ❓

ألعب اللعبة إزاي؟ تقدر تنزّلها من على جوجل بلاي وتلعبها من خلال التطبيق بشكل سهل وسريع لمستخدمي الأندرويد.

أعمل إيه لو مش قادر أنزّل التطبيق من جوجل بلاي أو لو كنت من مستخدمي الآيفون؟ تقدر تلعبها على المتصفح على طول من اللينك ده hazzar.app بسهولة جدًا برضه.

محتاج أسجّل حساب؟ لأ — عشان نضمنلك أسهل تجربة لعب.

الفلوس دي حقيقية؟ لأ طبعًا — أرقام للّعب بس، مفيش أي فلوس حقيقية ولا مدفوعات ولا جوايز في اللعبة.

الأرقام بتتحفظ؟ لأ — بتتمسح لوحدها أول ما الروم يخلص.

ينفع نلعب على موبايل واحد؟ لأ — كل واحد لازم يبقى على موبايله، عشان مايشوفش الرقم اللي المفروض يخمّنه.

لو النت قطع؟ اللعبة بتقف وتستنّاك، وأول ما ترجع بنفس الجهاز بتكمّل من نفس المكان وسكورك محسوب.